Улицата Даме Груев во строгиот центар ќе биде проширена за две коловозни ленти во обете насоки, на потегот од трговскиот центар „Палома бјанка“ до зградата на Собранието. Има 95% напредок во преговорите меѓу градската власт и Мите Јовановски, сопственикот на зградата, која му пречи на проширувањето и чиј дел мора да се урне.
Ќе се сече еден кат
Зградата, која ќе се урива во еден нејзин дел и ќе биде предмет на обесштетување од градскиот буџет, е седиште на поранешен „Макотекс“. Се наоѓа на раскрсницата на „Даме Груев“ со пешачката улица Македонија и нејзиниот пасаж му пречи на идното проширување.
– Точно е дека имаме напредок во преговорите, можам да кажам дека 95 отсто од работите се договорени. Останува да најдеме заеднички јазик и за преостанатите. Во секој случај, се уште се е начелно, немаме потпишано ништо конкретно – изјави Мите Јовановски, сопственик на зградата и на компанијата „Макоил“
Според градската власт најверојатно ќе одат на уривање на еден кат, конкретно на првиот кат, а остатокот на објектот ќе се држи на потпора под која ќе минуваат автомобилите, пишува Дневник.
Таа варијанта е една од трите предложени решенија од Институтот за земјотресно инженерство и инженерска сеизмологија (ИЗИИС), како безбедна варијанта со која нема да се наруши статиката на зградата. Фирмата „Гео инг МK“ изработува нацрт-решенија за решавање на проблемот со оваа зграда
– Сопственикот ќе добие соодветно обесштетување – изјавија од Градот.
Проширувањето на сметка на паркиралиштата
Проширувањето на „Даме Груев“ е важно за градската власт, бидејќи до трговскиот центар „Плаза“ се гради катната гаража „Тодор Александров“, а улицата ќе служи за примање на сите возила што ќе гравитираат кон неа. За Градот е уште поважно тоа што е замислена како улица со четири коловозни ленти, која ќе прими дел од сообраќајот од улицата Димитрија Чуповски, попозната како „Рекорд“. Поточно, на „Чуповски“ ќе се забрани автомобилскиот сообраќај и ќе стане делумно пешачка зона, односно по неа ќе се движат само трамвајот и евентуално автобуси од јавниот превоз. Но, за тоа градската власт допрва ќе одлучува и ќе нарачува проект. Според замислата на Град Скопје, „Даме Груев“ ќе биде булевар со четири ленти, по кој сообраќајот ќе се одвива во две насоки. Моментно улицата е еднонасочна. Новите две ленти ќе се градат на сметка на паркиралиштата пред кулите и зградите на Градски ѕид. Проблемот со возилата на станарите ќе се реши со паркирање во катната гаража „Тодор Александров“, која има две нивоа под земја и седум над земја, со капацитет за 605 автомобили.
Со реализацијата на овој проект, „Мал ринг“, од Стара чаршија до Музејот на Скопје и од Портата до „Палома бјанка“ ќе биде пешачка зона
