Новозеланскиот премиер Џон Кеј тврди дека никогаш не бил на вселенски брод, дека не е рептил и дека јазикот не му е премногу долг и потврда за своето тврдење побарал и од лекар и од ветеринар.
Со овој свој неверојатен чин Кеј ни потврди дека од политичарите може да се очекува сешто и дека повеќе ништо не смее да не изненади. Премиерот на овој начин се решил официјално да одговори и да ги демантира неодамнешните обвинувања дека е “вонземски рептил кој може да менува форма”, пишува Хафингтон пост.
“Презедов необичен чекор. Посетив не само лекар туку и ветеринар, а обајцата потврдија дека не сум рептил. Никогаш не сум бил во вселенски брод, никогаш не сум бил во вселената, а јазикот не ми е претерано долг”, порачува премиерот Кеј одговарајќи му на Шејн Ворбрук од Оукленд кој минатиот месец побара доказ дека премиерот не е едно од тајните суштества кои управуваат со светот и имаат за цел да ги поробат луѓето.
