Според податоците од 2017 година, Париз е најскапиот град за живеење во Европската унија, а седми во светот. Од сместување до храна и превоз, предизвикот е да се создаде буџет кој нема да остави горчлив вкус во устата. Еве неколку предлози и совети како да уживате во Париз, а вашиот буџет да го поддржи тоа уживање.
Музеи
Во Париз има над 130 музеи, од најпознатите како Лувр, Орсеј, Помпиду до музеите на парфеми, цигари и еротика. Доколку музеите се на вашата приоритетна листа, секоја прва сабота од октомври до март, влезот во сите музеи е бесплатен. Покрај овој специфичен период, доколку патувате во месеци и денови кога не можете да ја искористите оваа поволност, направете листа на музеи што би сакале да ги посетите пред вашето патување. На веб-страницата на секој музеј има посебен дел посветен на поволностите – во некои музеи билетот е поевтин ако го посетите попладне, исто така за деца до 18 години, или до 27 за резиденти на ЕУ, студенти и уметници во повеќето музеи влезот е бесплатен или со значителен попуст, а со купување билети онлајн, исто така, можете да обезбедите поевтина цена.
Бесплатно
Ако сакате уметност и скулптури, гробиштата Пер Лашез се вистински музеј на отворено, опкружен со зеленило, со над 70.000 споменици кои го пренесуваат духот на минатото – а влезот е бесплатен. Овие гробишта се едни од најпознатите и најпосетуваните во Париз, но и во светот. Се наоѓа во 20-тиот арондисман, а турата бара добро време и доволно часови да погледнете наоколу и да го пронајдете патот наоколу ако сакате да им оддадете почит на некои од познатите мажи и жени кои се погребани овде: Оноре де Балзак, Гијом Аполинер, Фредерик Шопен, Молиер, Џим Морисон, Едит Пјаф, Оскар Вајлд и многу други.
Источен Париз
Како и секаде, така и во источниот и западниот дел на градот има разлика и во изгледот на улиците и во ценовната политика. Источниот дел на градот ги опфаќа Бастилја, Република, Оберкампф, Менилмонтан… и е полн со мали, шарени бистроа и ресторани каде цените се пониски во споредба со централниот и западниот дел на градот. На улицата Белвил има голем број азиски ресторани, бидејќи оваа област е позната и како „Кина тоун“. Повеќето установи создаваат специјални дневни понуди кои се подостапни од класичното a la carte мени. Атмосферата во овој дел од градот е порелаксирана, мултикултурна, а жителите се уметници, хипстери, студенти и членови на работничката класа. Овој дел од градот е шармантен, со многу книжарници, галерии и улична уметност.
Пазари
Пазарите се совршен начин да се запознаете не само со локалната кујна и храна, туку и со кујната на генерации имигранти кои живеат во Париз и се чувари на автентичната блискоисточна, азиска, африканска кујна. Пазарите се појавуваат преку ноќ на плоштадите во близина на местата на метро – главно во четврток, петок и викенд. Меѓу тезгите ќе уживате во голем избор на свежо овошје и зеленчук, морска храна и месо, како и свежо печен леб, слатки и разни печива. Купувањето од маркет е поевтино. Едно од најпопуларните јадења што можете да ги купите на улица е печеното пилешко, со средна големина се продава за околу 5 евра. Пазари, фестивали на храна и пловечки пазари се исто така честа појава, а одлична можност да уживате во различни вкусови на едно место по пристапни цени.
Сега кога ги добивте потребните намирници, време е за пикник! Парижаните често уживаат во паузата за ручек на отворено – на трева, на клупа, дури и на бетон…секаде во Париз се чини дека е добро место за пикник. Ова се нашите најдобри три места за излет.
Паркот Луксембург се наоѓа на границата помеѓу Сен Жермен-де-Пре и Латинскиот кварт. Бил инспириран од градината Боболи во Фиренца, а е создаден на барање на кралицата Марија де Медичи во 1612 година. Помеѓу англиската и француската градина има шума и езеро, градина со рози, овоштарник и стаклена градина со орхидеи. Паркот има и над 100 статуи, монументалната фонтана Медичи и павилјони. За најмладите се достапни игралиште и куклени претстави, додека возрасните можат да играат шах, тенис и да уживаат во концерти на отворено. Совршено место за пикник, фотографирање, читање и уживање во парискиот начин на живот.
Комплексот La Villette е необично место, каде што се вкрстуваат зелените површини и културата. Во рамките на овој комплекс се наоѓаат музеи, концертна сала, театар и кино, како и парк од 55 хектари кој е и постмодернистички простор за рекреација. Со 3.000 m² еколошки градини кои промовираат биодиверзитет, Parc de la Villette е еден од најголемите и најубавите зелени површини во Париз. Мултидисциплинарната уметност и култура на оваа област привлекува повеќе од 10 милиони посетители секоја година. Тоа е место за уживање во многу форми на уметност и култура, научни и образовни активности, но и совршено место за рекреација, прошетка, пикник и истражување.
Париз има 37 мостови кои ја минуваат познатата река Сена, а од 1993 година се осветлени дури 33 моста, така што минувачите можат да уживаат во играта на сенките на камен, скулптури и метални или дрвени конструкции. Осветлувањето е приспособено на секој мост, што ја прави вечерната прошетка по Сена незаборавна.
На шеталиштата покрај реката, парижаните се собираат за да поминат време во разговор, смеење и дружење со вино и вечерен пикник. Седењето во кафуле е убаво, но седењето на брегот на Сена е посебно искуство!
Улична уметност
Првиот графит во Европа се појави токму во Париз и овој град имаше големо влијание на европската графити сцена. Париз е фантастична галерија на отворено во која ќе откриете неверојатна улична уметност за која не треба да плаќате билет, а ќе уживате во креативноста и деталите на овој универзален јазик на уметноста. Обрнете внимание на ѕидовите во самиот центар на Париз, латинскиот и еврејскиот кварт, во источниот дел на Париз и 13-тиот арондисман. Овие дела се создаваат и често исчезнуваат преку ноќ, но тоа е нивната убавина – да ги гледате додека се уште таму и да уживате во откривањето нови. Доколку сте љубители на ликот и делото на еден од најпознатите француски уметници на 20 век, Серж Генсбур, задолжително поминете покрај улицата Вернеј. На ова место се наоѓа куќата на Генсбург во која живеел до неговата смрт во 1991 година, а нејзините ѕидови претставуваат отворена книга во која и денес неговите обожаватели пишуваат и на тој начин му оддаваат почит.
Како поинаку можете да заштедите?
Главниот град на Франција има над 200 фонтани со безбедна вода за пиење.
Доколку сте во Париз за роденден, задолжително искористете го бесплатното крстарење по Сена што го нуди компанијата „Vedettes de Paris“. Се што треба да направите е да покажете лична карта или пасош и да добиете бесплатно крстарење со чаша шампањ.
Метрото е фантастичен начин за лесно движење низ градот, а цената на едно возење е 1,90 евра, па најдобро е да купите еден од билетите неколку дена – освен што ќе заштедите пари, ќе заштедите и на време потрошено за купување билети кај машините. Доколку се одлучите за картичка Навиго, за која ви треба фотографија, носете си слика со вас – фотографирањето на машините на станиците чини 5 евра.
Обиколката на музеј или парк трае најмалку два часа, а често продавниците и брзата храна на овие локации се поскапи отколку на други места или ги нема во близина. Однапред подгответе ужина – сендвич, овошје, бисквит, вода за да избегнете дополнителни трошоци или нервоза.
Совети
Французите многу ја почитуваат храната, па паузите за ручек се користат секој ден без исклучок. Во бистроата и рестораните има одредено време во текот на денот кога се служи појадок, ручек и вечера. Ако видите гужва, тоа значи дека има пауза за ручек и избегнувајте да нарачувате само пијалоци или да седите на маса поставена за ручек во тој период – секогаш проверувајте дали имаат маси кои се наменети само за пијалоци.
Во периодот на ручек, повеќето ресторани создаваат комбинации од неколку артикли од менито по подобра цена . Повеќето места имаат мени пред ресторанот каде што можете да се запознаете со понудата и цените.
Бидејќи зградите се стари, често се случува тоалетот да го делат сите станови на подот, па затоа внимавајте на оваа ставка кога барате сместување.
Многу станови немаат машина за перење, па пералниците се честа појава. Цените се движат од 3 до 7 евра во зависност од количината на алишта (во килограми), а користењето на машината за сушење се плаќа дополнително, од 1 евро нагоре.
З.Д / Д.П / В,П.Д / С.Ж.П / А.Д / С.Д
