Во септември, актерот Раде Шербеџија, кој од вчера е натурализиран Македонец, ќе го снима неговиот прв долгометражен игран филм „Ослободување на Скопје“. Локациите се Битола и Велес. Познатиот актер вчера се сретна со министерката за култура Елизабета Kанческа-Милевска, која му го честиташе државјанството, што го добил по негово барање. Шербеџија кажа дека ова државјанство дошло по природен пат.
– Јас сум познат во целиот свет. Луѓето ме среќаваат и се фотографираат со мене насекаде. И сите ме познаваат како Александар од „Пред дождот“ така што ова државјанство е логично – рече Шербеџија додавајќи дека цел живот ја сакал македонската музика, а и дека изведувал македонски песни на своите настапи.
Од актерската екипа со која ќе соработува засега ја издвои само Силвија Стојановска, со која играше и во „Пред дождот“.
– Имаме одличен избор на актери. Речиси сите се од Македонија. Некои нови, млади лица. Требаше јас да бидам странец, но, ете, сега и јас сега не сум – рече Шербеџија.
Филмот ќе се снима седум недели, и тоа на македонски јазик. Ќе бидат вклучени голем број филмски работници од Македонија, а во авторскиот дел работат Иван Бартлинг, музиката е на Влатко Стефановски, а зад камерата е Дејан Димески. Во продукцијата се вклучени и Горјан Тозија и Владимир Анастасов-Вац. Филмот е копродукција помеѓу Македонија, Хрватска, Белгија, Исланд, а можно е да се вклучи и Финска.
– Цел живот бев заразен со идејата за „Ослободување на Скопје“. И Ѓорѓи, што го играв во ТВ-филмот, е можеби најголемата улога во мојот живот. И таа приказна за млад човек и девојка и за нивната невозможна љубов меѓу Германец и Македонка, што во тоа време е незамисливо, тој е окупатор, но добар човек е. Препознав дека светот ја сака и ја памти таа приказна и посакав да го снимам филмот – рече Шербеџија.
