Сервисирањето технички апарати бил најголем проблем на кој се пожалиле македонските граѓани во април годинава до Организацијата за заштита на потрошувачите. Најмногу поплаки имало за мобилни телефони, лап-топ, телевизори, како и производи од бела техника меѓу кои се фрижидери, машини за перење и шпорети, пренесува ЗаСе.Мк.
Организацијата за заштита на потрошувачите појаснува дека сервисирањето на производот може да трае најмногу 30 дена и дека доколку не се сервисира во тој период, потрошувачите имаат право да бараат нов производ или поврат на средствата.
Потрошувачите реагирале и на купувањето во интернет продавници и неможноста да остварат контакт доколку не се задоволни од производот што го порачале.
– Овие производи се доставуваат по пат на брза пошта, а проблемот се јавува кога потрошувачите не се задоволни од производот или кога добиле сосема друг производ од тој што го нарачале и сакаат да го остварат своето право и да го вратат производот во рок од осум дена. Тогаш тие се доведени во една лоша позиција поради тоа што најчесто контакт со трговецот речиси нема, а најчесто има само еден мобилен телефон кој не е во функција. Така тие не можат да го остварат своето право да го вратат производот во рок од осум дена затоа што немаат информација на која адреса треба да се прати, иако многу често на овие веб страници пишува дека производот може да се користи дури и до 60 дена и доколку потрошувачот не е задоволен може да го врати, наведуваат од ОПМ.
Потрошувачите се пожалиле и на јавните претпријатија и телекомуникациските оператори. Најчесто за сметките кои или им стигнувале однапред или пак воопшто не стигнале, потоа биле нереални сметките за вода и смет или парно.
Потрошувачите се жалеле и на готовата храна што се продава во некои супер маркети бидејќи немало наведено декларација со содржината. ОПМ реагирала до Агенцијата за храна и ветеринарство за да се истакнува декларација со цел потрошувачите да бидат информирани за какво јадење се работи и што содржи
