Нобеловата награда за мир денеска во Осло им беше врачена на Малала Јусафзај од Пакистан и на Кајлаш Сатјарти од Индија бидејќи тие ги ризикувале своите животи борејќи се за правата на децата.
Церемонијата накратко беше прекината кога млад непознат маж истрча пред Малала веејќи го знамето на Мексико. Се уште не се познати причините за инцидентот.
Малала изјави дека се надева оти таа награда ќе ги инспирира сите девојки во светот да се борат за своите права.
Таа е најмлада добитничка на Нобеловата награда за мир додека Сатјарти е на 60-годишна возраст.
Претседателот на норвешкиот Нобелов комитет Торбјерн Јагланд изјави дека сите деца имаат право на детство и образование, а не на принудна работа, истакнувајќи дека овогодишните победници најдобро ја одразуваат совеста на светот.
