Од вчера почна реконструкцијата на крајната сообраќајна лента на булеварот Kузман Јосифовски – Питу, кај автобуското стојалиште пред Народна банка. Почетокот на работите го означи скопскиот градоначалник Kоце Трајановски.
– Оваа улица беше целосно обновена во 2011 година, но веднаш пропадна, па изведувачот го санираше стојалиштето кај банката на свој трошок. Но, коловозот и по тоа повторно пропадна. Затоа Градот направи дополнителни испитувања и мерења и констатира дека подлогата под стојалиштето не е квалитетна – објасни Трајановски.
Тој информираше дека е направен нов проект кој предвидува да се извади тампонскиот слој и целосно да се реконструира коловозот.
Kрајната сообраќајна лента ќе се обнови во должина од 200 метри, пред и по автобуската станица. Оштетениот и вдлабнат површински асфалтен слој ќе се изгребе, ќе се санира потповршинскиот слој до длабочина од еден метар и повторно ќе се асфалтира. Исто така, ќе се нивелираат постојните шахти и сливници.
По завршувањето на овие активности, ќе се реконструира и крајната сообраќајна лента пред стојалиштето кај „Веро центар“ во должина од 102 метра, а потоа и лентата пред станицата кај МАНУ. Минатиот месец се работеше кај автобуското стојалиште на „Рекорд“.
