Секторот за внатрешни работи – Битола информира дека денеска од страна на директорот на ОУ „Коле Канински“ од Битола е доставено официјално барање за постапување затоа што, како што е пријавено, кај неколку ученици била забележана појава на самоповредување.
Во соопштение до јавноста, СВР-Битола нагласуваат дека се постапува со најголема сериозност по барањето со цел расчистување на овој случај.
-Побарана е информација од ЈЗУ Здравствен дом Битола, од каде не известија дека до денеска во нивната здравствена установа не е побарана медицинска интервенција врз пациенти – деца кои имале повреди настанати како резултат на самоповредување. Во контакт со Клиничка болница Битола , исто така добивме известување дека во Клиничка болница Битола во изминатиот период па се до денес не се примени малолетни деца со нанесени повреди по телото поврзани со ваков случај. Од ЈУМ Центар за социјални работи Битола сме известени дека до денес дошол еден родител, кој побарал институционална помош за детето за надминување на проблемите кои се јавиле во однесувањето на детето кое пробало да се самоповреди на раката (настан кој се случил пред Нова година), посочуваат од СВР- Битола.
Во соопштението на СВР-Битола се наведува дека во текот на денешниот ден се јавило на разговор и друго семејство за своето дете кое минатата недела си нанело повреда. Извршен е разговор со директорот на училиштето и прибрани се сите информации за понатамошно постапување и преземање на мерки околу расчистување на случајот. Се преземаат координирани активности и мултисекторско постапување со вклучување на стручните педагошки и психолошки служби на училиштата, Центарот за социјални грижи и здравствените институции, информираат од СВР-Битола.
Бизарната онлајн игра е пријавена во Аргентина, во Мексико, во САД, во земјите на Јужна Америка, во Франција и во Германија, а се проширува и во другите европски држави, сега за жал и во Македонија.
Инаку, за играта „Момо” се упатуваа апели со месеци. Измислениот и грозно направен лик Момо им се заканува на децата дека мора да го додадат на Whats App или ќе ги убие додека спијат.
Исто така, и играта „Синиот Кит” се рашири кај малолетниците низ светот, а според медиумските извештаи се работи за период од 50-на дена играње, кога пред децата се поставуваат најразлични задачи, на почетокот помалку опасни, како што е на пример гледањето на хорор филмови, за потоа да биде побарано самоповредување со втиснување на син кит на рацете, а сето тоа завршува со повик на извршување на самоубиство.
