На денот кога ги убила своите две ќерки среде улица, Американката Кристи Шитс облекла розова тоалета и го повикала семејството на состанок во дневната соба, а потоа почнала да пука во нив.
Семејството побегнало на улица пред Кристи, за која пријателите велат дека била приврзана и горда мајка. Сопругот Џејсон успеал да се спаси со бегство во слепата улица во близина, но ќерките ја немале таа среќа.
Седумнаесетгодишната Медисон Шитс паднала на улица, каде починала од повреди во вратот и градите. Пет години постарата Тејлор, која починала во болница, била застрелана во главата и торзото.
Откако мајката го извлекла оружјето, ќерките панично повикале 911. На објавените снимки од повикот се слуша како едната ќерка ја моли својата мајка: „Те молам! Прости ми! Те молам, немој да пукаш”. Друг женски глас се слуша како вика: “Те молам, жал ми е. Те молам. Не пукај во неа!”.
Во еден момент на снимката се слуша и подебел глас, веројатно на сопругот Џејсон, кој вели: „Ти ветувам, сè што сакаш!“. Повикот во тој момент бил прекинат.
Соседот слушнал истрели и повикал полиција. Тој рекол дека гледа жена со пиштол и дека две лица се погодени. Името на соседот не е објавено поради анонимност, но деталите кои ги пренел во полицијата сепак дошле до јавноста.
Постарата ќерка била жива во моментот кога колабирала на патот, а нејзината мајка се обидела повторно да ја застрела. Меѓутоа, Кристи поседувала само малокалибарски револвер со пет куршуми. Таа се вратила дома, го наполнила пиштолот, излегла на патот и повторно ја застрелала постарата ќерка.
Кратко по повикот на соседот, полицијата излегла на интервенција и ја затекнала Кристи на патот. Бидејќи одбила да го фрли оружјето, таа била убиена со еден куршум во градите.
