Заев ќе ги пука „бомбите“во понеделник – Проект „Вистината за Македонија“

Централниот одбор на СДСМ на вечерашната седница го овласти раководството на партијата да се обелоденат документите за незаконско прислушкување на илјадници граѓани, за целосна контрола и злоупотреба на сите државни институции во партиски и изборни цели, да се објават материјалите за злоупотреба за груби нарушувања на изборниот процес, вклучувајќи криминал и корупција во највисоките ешалони на власта.

Во заклучоците од вечерашната седница на ЦО е констатирано дека документите ги потврдуваат ставовите на дел на домашната и странската јавност за притисок врз медиумите, слобода на изразување, диктирана правда, целосна контрола на државните институции од врхушката и за згазена правна држава. Во заклучоците е нагласено дека според Уставот и законите на Република Македонија, никој нема право да го спречи објавувањето на документите.

– Од понеделник почнуваме да ги објавуваме сите материјали, вистината, драги мои граѓани на Македонија, ќе излезе на виделина – изјави за Плусинфо лидерот на СДСМ, Зоран Заев.

Седницата траеше три часа и на неа беа присутни сите членови на ЦО, кои едногласно ја донесоа оваа одлука. Интерес за седницата на Централниот одбор на најголемата опозициска партија имаа и странски медиуми, кои заедно со македонските колеги ја чекаа одлуката на раководството на СДСМ, која се носеше зад затворени врати.

Плус Инфо