Поранешниот премиер на Шкотска Алекс Салмонд починал за време на предавања на Школата за млади лидери во Охрид, потврди Канцеларијата на поранешниот претседател Ѓорге Иванов, кој е организатор на Школата.
На Салмонд, 69-годишен, му се слошило за време на предавањата, по што починал. Информацијата ја потврдија од Министертвото за внатрешни работи.
„Во СВР Охрид денеска во 15.30 часот е пријавено дека во хотелот ‘Инекс Горица’ ненадејно починало лице од Шкотска. Странскиот државјанин држел предавања на Школата за млади лидери, кога му се слошило. Дополнително ќе се утврдуваат причините за смртта“, велат од МВР.
Тој ја предводеше СНП кога победија на изборите за шкотскиот парламент во 2007 година, откако претходно ја водеше партијата помеѓу 1990 и 2000 година.
Салмонд, кој беше за независност на Шкотска, потоа ја предводеше СНП до невидено мнозинство на изборите четири години подоцна. Салмонд исто така беше ослободен од обвиненијата за сериозни сексуални престапи по судењето во Единбург во 2020 година. Откако ја напушти СНП во 2018 година, тој формираше алтернативна партија за поддршка на независноста, наречена Алба, чиј лидер беше тој.
Алба се обрати до Министерството за надворешни работи на Обединетото Кралство за помош за враќање на телото на г-дин Салмонд.
Првиот министер Џон Свини рече дека е „длабоко шокиран и тажен“ од веста и изрази сочувство до сопругата на Салмонд, Моира и неговото семејство.
Свини додаде: „Алекс работеше неуморно и бестрашно се бореше за земјата што ја сакаше и за нејзината независност.
„Тој ја зеде Шкотската национална партија од маргините на шкотската политика и ја однесе во владата и ја водеше Шкотска толку блиску до тоа да стане независна земја.” Изјави Свини.
Салмонд беше избран во шкотскиот парламент кога беше формиран во 1999 година, но се откажа од функцијата. подоцна да се врати како лидер во 2004 година.
Сер Кир Стармер го опиша Салмонд како „монументална фигура на шкотската и британската политика“.
„Повеќе од 30 години, Алекс Салмонд беше монументална фигура на шкотската и британската политика. Тој остави зад себе трајно наследство.”
