Службеничка во штипскиот Центар за социјални работи е нападната од жена и маж кои живееле во вонбрачна заедница, бидејќи таа им доставила негативно решение, со кое им се укинува социјалната помош.
Инцидентот го потврдуваат и од СВР-Штип, кои интервенирале во овој случај.
Настанот се случил во канцеларијата на Центарот за социјални работи, најпрво вонбрачниот пар од ромската заедница почнале вербално да се расправаат и во еден момент 21 годишната жена се нафрлила на службеничката, се обидела да ги ставе рацете околу вратот за да ја дави. Службеничката и нејзината колешка ја спречиле агресивната жена во намерата, а повиците за помош ги слушнале и останатите службеници од центарот, кои веднаш повикале полиција.
Повредената службеничка е хоспитализирана во штипската Клиничка болница, каде лекарите констатирале нагмеченици на едната рака и е задржана во болницата.
Од СВР-Штип велат дека против 21 годишната штипјанка која ја нападнала службеничката во Центарот за социјални работи ќе поднесат соодветна кривична пријава кога целосно ќе се комплетираат случајот.
