Пренасочување на друг лет, целосно враќање на уплатените пари за авиобилет и ако имате среќа – храна, пијалаци и платено сместување во хотел додека чекате да се качите во авион. Ова им следува на патниците чии летови се одложени или целосно откажани поради магла на аеродромите. Дополнителна парична отштета на патниците за изгубеното време и за малтретирањето, според европските регулативи, не им следува. 
Македонските аеродроми, особено скопскиот, честопати во зимските месеци се соочуваат со долги одложувања или целосни откажувања на летовите поради магла. Таков случај имаше и лани, кога цел декември речиси и да немаше сообраќај на „Александар Велики“ поради густа магла, а илјадници патници имаа тешкотии да стигнат до саканите дестинации. Тогаш авионите се пренасочуваа на охридскиот или на другите најблиски аеродроми во регионот. Иако многу патници реагираат дека во вакви случаи авиокомпаниите ги оставаат самите да се снајдат како знаат и умеат или, пак, чекаат со саати информации или алтернативен превоз, досега ниту еден патник не се пожалил во Агенцијата за цивилно воздухопловство (АЦВ).
Европските регулативи за заштита на правата на патниците предвидуваат дека авиокомпаниите се должни да се грижат за своите патници чии летови се долготрајно одложени или целосно откажани, меѓу другото, и во случаи на лоши временски услови. Ако летот е откажан, патниците имаат право да го побараат назад целиот износ што го платиле за авиобилетот. Ако станува збор за подолго одложување, може да избираат дали ќе се префрлат на некој друг лет или ќе ги добијат уплатените пари назад. Без разлика за колкаво чекање поради магла и други лоши временски непогоди станува збор, авиокомпанијата е должна за тоа време на патниците да им обезбеди храна, пијалаци, хотелско сместување ако е неопходно, како и евентуален превоз од хотелот до аеродромот и назад. Евентуална дополнителна парична отштета за изгубеното време и слично не е предвидена, со оглед на тоа дека станува збор за откажувања предизвикани поради елементарни непогоди, на кои авиокомпанијата не може да влијае.
Нискобуџетните компании, пак, кои најчесто немаат свои канцеларии на самите аеродроми, нудат опции на интернет за да може патниците да си ги остварат правата во вакви ситуации. Унгарската „Визер“, која лета на десетина дестинации од Скопје, на својата веб-страница ги информира патниците како да постапат во вакви ситуации.
„Искрено се извинуваме за непријатностите предизвикани од неодамнешното откажување на Вашиот лет. Видете го детаљниот список подолу за да проверите дали Вашиот лет навистина е откажан. Ако е, најавете се на профилот myWizz (горе десно), отворете ја својата резервација и ќе можете да резервирате повторно преку интернет бесплатно. Ако веќе не сакате да патувате, ја откажуваме Вашата резервација и ги враќаме парите за вкупната цена платена за откажаниот лет. Поднесете го овој формулар за да побарате поврат на средствата“, пишува на страницата на „Визер“.
Од АЦВ објаснуваат дека ако авиокомпанијата не ги исполни своите обврски кон патниците во случаи на откажување или одложување на лет, тие прво треба писмено да реагираат до самата авиокомпанија. Ако не добијат повратен одговор во следните шест недели или не се задоволни од него, може да се пожалат во АЦВ. 
Европските авиокомпании „забошотуваат“ за отштетата
Ако доцнењето или откажувањето на летот не се должи на временски услови, туку е поради некој пропуст на авиокомпанијата или, на пример, штрајк, патниците дополнително може да добијат отштета од 125 до 600 евра, во зависност од далечината на дестинацијата до која треба да патуваат и од времето на доцнење.
Европските регулативи важат за авиокомпаниите од ЕУ што летаат во рамките на Унијата, но и за тие што летаат од земји во Европската Унија кон други земји што не се членки. Медиумите во Европа пишуваат дека и покрај тоа што европските регулативи предвидуваат парични отштети за патниците, авиокомпаниите најчесто наоѓаат начин да не им ги исплатат правдајќи се дека доцнењето или откажувањето било поради „виша сила“.
Dnevnik.mk
