Поголемиот дел охриѓани и стружани ќе останат дома за Нова година, оти, како што велат, беспарицата си го прави своето. Тие со подлабок џеб ќе одат надвор од државата, а најмногу зантересирани имало за Будва, пренесува Радио слободна Европа.
Од туристичките агенции во Охрид и Струга велат дека и оние аранжмани кои ги продале за Нова година се од поевтините за разлика од минатото кога граѓаните оделе за празниците и до Египет.
„Има интерес од нашите граѓани од Охрид за поблиските дестинации. Доста имаме заинтересирани за Будва и веќе дел се реализирани. Поевтините дестинации се бараат годинава. Патуваат повеќе оние кои можат да си дозволат и тие имаат можност и преку интернет да си купат аранжмани“, рече Елида Битрак од ТА Елида турс од Охрид.
„Интересот е на доста слабо ниво посебно за стружани кои сакаат да патуваат надвор од Струга. Дестинации кои се интересни се поевтините и имаме голем интерес за Будва бидејки таму има добра забава. Стружани најверојатно празниците ќе ги поминат во своите дома“, рече Анкица Крстаноска од туристичката агенција Аура травел од Струга.
