Зрно грав ќе било кобно за 5-годишно девојче од Сарај. Го вдишало и за кратко време почнало да се гуши. Според информациите на zdravstvo24.mk помодрено и во животозагрозувачка состојба било донесено на Клиниката за Уво нос и грло.
На Клиниката веднаш бил мобилизиран тимот за ендоскопија. Девојчето итно било внесено во сала каде според лекарите секунди биле во прашање за спасување на детскиот живот.
-Детето беше помодрено и во животозагрозувачка состојба. Самата интервенција се состои во тоа што со метална шипка се влегува во белите дробови и самата интервенција е од висок ризик. Значи секунди се во прашање дали таков случај ќе го изнесете жив од операциона сала. Но туѓото тело е отстрането и сега детето е во добра состојба, вели д-р Горан Мицевски шеф на операциони сали на Клиника за Уво, нос и грло, пренесува Здравство24.
-Од анестезиолошки аспект беше понудена поддршка бидејќи вакви туѓи тела прават отежнување на виталните функции особено на респираторните. Тоа беше направено и детето е спасено, вели д-р Ангелина Трајковска анестезиолог на Клиниката ОРЛ.
Мајката не знае како дошло до драматичната ситуација. Ќерката играла со другарчиња и после тоа почнала да се гуши. Прво ја однеле во поликлиниката во Ѓорче Петров од каде итно ги испратиле на клиника.
Целата сторија прочитајте ја на Здравство24
