Грчкиот министер за финансии Јанис Варуфакис призна денеска дека го снимил состанокот на министрите за финансии од еврозоната и ги критикуваше медиумите поради „лаги и инсинуации“ во извештаите за настаните од состанокот, одржан на 24 април во Рига.
Варуфакис минатата недела изјави за „Њујорк тајмс“ дека го снимил состанокот во Рига, што наиде на критики од поединечни грчки медиуми и опозицијата дека таквиот чекор би можел да ги поткопа напорите на Грција да обезбеди заем од кредиторите. 
Грчкиот министер на својот блог и за британската Би-Би-Си наведе дека често ги снима своите одговори на мобилен телефон и оти тие снимки му служат за да подготви извештај за седницата на грчката Влада.
– Истото го сторив и на состанокот на Еврогрупата во Рига и потоа во Атина ја искористив таа снимка за изработка на извештајот за своите колеги, истакна Варуфакис.
Правилата на Еврогрупата не им забрануваат експлицитно на учесниците да ги снимаат разговорите се додека нивната содржина останува во тајност.
Варуфакис нагласи дека целосно ги почитувал правилата на доверливост на состанокот и оти не излегол со детали во јавноста, дури и на провокациите на медиумите.
