Во декември минатата година, норвешката полиција на патот во близина на една автоперална пронашла човек со тешка амнезија. Тој не знаел кој е, ни како завршил во Осло.
Единствено нешто што се знаело за него е дека бил во раните дваесет години и дека говори пет странски јазици меѓу кои и англиски со тежок словенски акцент. Полицијата се обидела да го пронајде преку меѓународни канали со помош на ДНК и отпечатоци од прсти, но кога ништо од тоа не вродило со плод, во вторник испратиле и слика од него.
Денеска дојде веста дека несреќниот човек е идентификуван од страна на чешката полиција. Интерпол бил во контакт со неговите родители, но името на човекот не е дадено во јавноста и се уште истиот е познат под името Џон Смит. Тој рекол дека се сомнева дека бил ограбен и сексуално злоупотребен.
„Дефинитивно јас бев силуван, а потоа и фрлен на една улица во Осло. Можно е да сторителот го искористил тоа што Европа има отворени граници, и Осло бил избран како место за да ме фрлат како ѓубре“, изјавил Смит.
