Грчката полиција извести дека е распишана потерница за две државјанки на Македонија, едната на возраст од 21, а втората на 35-годишна возраст, кои заедно со нивен пријател ограбиле продавници и локали во северниот дел на нашиот јужен сосед, објави грчкиот дневен весник Прототема.
Нивниот 32-годишен „шеф“ од Македонија, според весникот, е уапсен вчера и денеска им е предаден на истражните судски органи во Кукуш.
Тројката од Македонија, постојано влегувала во Грција и откако ќе ограбела претходно маркиран објект, веднаш бегала во татковината. Засега за нив се знае дека ограбиле автомобил, две цркви, кафетерија, цвеќарница и продавница за техничка стока. Вредноста на украдените предмети надминува 8.000 евра.
