Искршени се и прозорците и влезната врата, која стои ширум отворена. Објектот на булевар Климент Охридски, веднаш спроти книжарницата „Матица”, се распаѓаа во него влегува кој сака.
Скопјани велат дека со страв поминуваат покрај разурнатиот објект, кој им наликува на куќа на стравот, пишува Вест.
„Доцна навечер нема шанси да поминеш покрај оваа куќа, а однатре да не слушнеш викотници. Полна е со луѓе што тука доаѓаат да преспиваат, а многу често пуштаат музика и се забавуваат. Фрлаат шишиња дури до булеварот, а наутро го оставаат целото ѓубре”, коментираат минувачите.
Од Општина Центар најавија дека ќе ја проверат состојбата со објектот и ќе одлучат какви мерки ќе преземат потоа.
Ова не е прва куќа која скопјани ја крстија куќа на стравот. До пред една година најпознат ваков објект беше зелениот замок во населбата Црниче. За него луѓето раскажуваа разни приказни поврзани со духови и фамилијарни трагедии.
Во овој замок, познат доктор по кинезитерапија во Скопје, со камера сними силуета на дух и јавно ја објави минатата година.
Кусо потоа куќата ја срушија, и на нејзино место изградија зграда.
