Организацијата Лекари без граници (МСФ) објави драматично предупредување дека вирусот Ебола, кој во текот на изминатите неколку месеци е распространет во Западна Африка, тотално е надвор од контрола
“Ние имаме сѐ помалку ресурси да се справиме со заразата, потребни нѝ се повеќе луѓе. Туку што започна вториот бран на епидемијата и што се однесува до нас тука, работата е тотално надвор од контрола”, изјави еден од лидерите на МСФ Bart Janssens, кој раководи со тим од 40 медицински лица во четирите центри распределени по Гвинеја и Сиера Леоне.
“Ситуацијата е навистина многу итна и за решавање е неопходна посветеност и ангажман на политичарите. Инаку, вирусот ќе продолжи да се шири и во повеќе земји”, предупреди Janssens, критикувајќи ја при тоа и Светската здравствена организација (СЗО) заради бавната реакција.
Во СЗО на прозивките на МСФ за сега не реагираат, но пред неколку дена портпаролката на агенцијата на ОН призна дека сегашната ситуација е еден од најголемите предизвици во историјата на борбата со ЕХФ.
Инфекцијата почна во Гвинеја кон крајот на минатата година, а откако се чинеше дека ситуацијата почна да се смирува, вирусот почна нагло да се шири во околните земји. Неодамна, првите случаи биле регистрирани и во милионската Монровија, главниот град на Либерија, на државата во која MSF уште нема воспоставено ниту еден центар за третман на инфицираните.
Најголемиот проблем е фактот дека во оваа област Ебола ја немало, така што луѓето се слабо запознаени со симптомите на инфекцијата и кај докторите често се јавуваат премногу доцна, а ниту сите лекари не препознаваат за што станува збор од прва.
Досега починаа повеќе од 330 луѓе, со што е надмината злогласната епидемија во 1978 година, кога на територијата на денешна Демократска Република Конго, вирусот Ебола уби најмалку 280 луѓе.
