Апелацискиот суд од Скопје ја потврди пресудата на Велешкиот суд кој ја осуди на една година затвор медицинската сестра Верка Атанасовска од Градско, вработена во Медицински центар Велес.
Четириесет и шестгодишната Атанасовска беше вработена во Центарот за лекување на наркозависници во ЈЗО Општа болница во Велес.
Пред година и пол на главната улица во Велес беше фатена при продажба на метадон на една зависничка. Велешката полиција ја уапси и осомничи.
Јавното обвинителство ја обвини за неовластено производство и пуштање во промет на наркотични супстанци, а судот ја осуди на една година казна затвор. Според обвинението Атанасовска два месеци наназад земала метадон од Дневниот центар и за пари го продавала на зависник.
Анастасовска беше фатена на 12 октомври 2011 година околу 15 часот на улицата Благој Ѓорев” во Велес како продава метадон на лицето О.Ј. која е регистриран пациент во Дневниот центар за зависници од дрога” во Велес. На судењето во Основниот суд во Велес Анастасовска се бранела со молчење и не кажала ниту збор во своја одбрана.
