Граѓаните што живеат покрај него се жалат дека со години дишат отрови кои се шират од отворениот канал. Тие велат дека до пред неколку години смрдело само на канализација и урина, а сега веќе и на расипани јајца.
Тие се плашат дека во каналот се испуштаат хемикалии, од кои измуреле и жабите и полжавите во него,пишува Вест.
“По тоа ќе забележиме дека не се работи само за фекалии туку за хемикалии кои ние секојдневно ги вдишуваме. Веќе не може да се види една жаба ниту, пак, жителите собираат полжави, како што правеа секоја пролет во изминативе години. Не можеме раат да седнеме во двор оти труе на расипани јајца. Луѓето што живеат веднаш до каналот не можат да се спасат од смрдеата ниту дома, оти таа продира преку затворените прозорци. Тоа што смрди неподносливо, веќе не ни претставува толку голем проблем, колку што не знаеме што вдишуваме. Се плашиме да не се затруеме”, објаснуваат жителите.
Тие велат дека повеќепати досега побарале од Општината и од Град Скопје да го затворат каналот, но оттаму не добиле одговор како да се реши проблемот.
“Не сакаат да дојдат ниту да ја искосат тревата околу него, а камоли да го исчистат и да го затворат”, додаваат тие.
Од општините Аеродром и Кисела Вода, низ кои поминува овој канал, се изјаснија за ненадлежни за негово одржување.
Од Град Скопје, пак, велат дека единствено решение што може да им помогне на жителите, е да не ги поврзуваат комуналните приклучоци на каналот.
“Каналите, од технолошки и од еколошки аспект, не смеат да се затвораат. Доколку се затворат каналите, во определени периоди од годината ќе доаѓа до поплавување на поширокиот реон околу нив, а во останатото време не ќе може да чистат. Единствен начин за да се заштитат граѓаните од несаканите појави е да се користат каналите за прибирање атмосферски води, а не да се приклучуваат комунални приклучоци на нив”, изјавија од Град Скопје.
