На денешната надзорна расправа во Комисијата за еднакви можности на жените и мажите, посветена на семејното насилство и неговата превентива, министерот за внатрешни работи Панче Тошковски најави измени во Законот за спречување и заштита од насилство врз жените и семејното насилство, особено во делот на итните и привремени мерки.
– Клучната промена е во воведување на ново полициско овластување со кое што полицискиот службеник врз основа на проценка од ризик и при утврдена јасно дефинирана непосредна опасност ќе може веднаш да изрече итна мерка за заштита на жртвата, односно сторителот да го отстрани од домот, да му забрани приближување и да му забрани контакт со жртвата – рече министерот Тошковски..
Оваа мерка, според Тошковски, ќе се изрекува веднаш, без согласност од жртвата, може да трае до 48 часа, а потоа Судот ја потврдува, укинува или продолжува до 30 дена, мерка согласно Истанбулската Конвенција.
– Паралено со законските измени работиме да обезбедиме „боди-камери“ за полициските службеници затоа што во вакви постапки не е доволно само навремено да се интервенира, туку и поддеднакво е важно точно да се документира што се се затекнало на лице место, како постапила полицијата и каква фактичка состојба има при интервенција. Во пракса, тикму тука најчесто се отвора простор за различни толкувања или релативизирање на тоа што се случило – истакна Тошковски.
Министерот за внатрешни работи Панче Тошковски одговараше на поставени прашања од членовите на Комисијата за еднакви можности на жените и мажите и нагласи дека според податоците од март системот почнува да се движи поинаку, институциите конечно почнуваат да го третираат овој огромен општествен проблем со сериозноста што одамна ја заслужува.
– Семејното насилство е проблем што со години бил јасно видлив и во институционалната пракса, но и во статистиката и предолго се третирал фрагментирано со задоцнета реакција и без суштинска координација меѓу институциите – рече Тошковски.
