29-мината обвинети за тероризам и за учеството во крвавиот мајски инцидент во кумановско Диво Насеље треба за првпат да се појават во суд. Во кривичниот суд Скопје 1 ќе се одржи јавна седница за оценка на обвинителниот акт против припадниците на кумановската група, пренесе Телма.
Сите обвинети добиле покана за присуство, потврдија дел од адвокатите со кои контактирала Телма. Обвинителниот акт беше поднесен на почетокот на ноември, а бранителите на обвинетите поднеле приговори. Сметаат дека обвинението е неосновано.
По утрешната седница судскиот совет треба да одлучи дали ќе го прифати обвинителниот акт или ќе бара да се преработи.
–Обвинителството смета дека 29-мината уапсени, двајца кои избегаа и уште десетмина кои загинаа во Диво Насеље од почетокот на годината почнале со организација на терористички активности кои кулминираа со крвавата пресметка на 9-ти и 10-ти мај. Целта им била да предизвикаат чувство на несигурност и страв меѓу граѓаните – стои во обвинението.
