Од 26 март годинава, сите македонски граѓани на кои им е потребна британска виза ќе можат да аплицираат во компанијата „Teleperformance“, која има потпишано договор со британската Агенција за визи и миграција.
Апликациите за визи ќе се примаат со претходно закажан термин во канцеларијата на компанијата која ќе биде лоцирана во трговскиот центар Соравија и ќе работи од 9 до 13 часот од понеделник до среда.
За услугата, граѓаните ќе треба да платат 59 фунти.
Повеќе информации околу измените во врска со начинот на работа, граѓаните ќе можат да добијат преку веб страната на Амбасадата на Велика Британија.
Британската Агенција за визи и миграција на 30 септември објави дека глобалните договори за оперирање со центрите за аплицирање за визи им се доделени на фирмите Teleperformance Ltd и VFS Global.
