Дека животот кон некои е навистина суров, доказ е следнава вистинска приказна за 9- годишното дете Луо Кун Кун, кој е протеран од родното село, кога жителите вклучувајќи го и неговиот дедо, потпишале петиција за да го „заштитат здравјето на селаните“ од „темпирана бомба“.
Детето заболело од сида, па поради својата болест станал „натрапник“ во селото.
Кун Кун се заразил од својата мајка уште додека бил во нејзиниот стомак, но болеста била откриена кога наполнил 5 години. Неговата мајка и очувот работеле во друга провинција, па детето растело кај бабата и дедото на очувот.
Бидејќи не сакале да го примат во ниту едно училиште, а соселаните избегнувале секаков контакт со него, Кун Кун, најголемиот дел од времето го поминувал сам, играјќи се во шума.
Минатата година, 207 жители од селото, потпишале петиција во која бараат од власта да превземе мерки за заштита и да го одведат Кун Кун од селото, за да го зачуваат своето и здравјето на своите деца.
Во текстот пишувало дека Кун Кун е „страв за заедницата“ и дека е „темпирана бомба“.
Но, сепак судбината имала други намери за Кун Кун.
Тој добил место во интернат во училиштето во Линфен и од ноември месец минатата година редовно почнал да зема лекови против ХИВ.
