Петмина од затруените со печурки се наоѓаат во тешка здравствена состојба по масовното труење на осуммина членови од едно семејство од Тетово.
На Клиниката за токсикологија им била извршена промена на целокупната затруена плазма од крвта, а на секој од нив им биле дадени по 12 кесиња крвна плазма. Вкупно 60 кеси плазма биле донесени од Клиниката за трансфузиологија за да им се спаси животот на затруените, пренесува Нова.
Станува збор за млади луѓе, четворица од нив членови на потесно семејство од Тетово и нивни роднини. Една од затруените била донесена заедно со нејзиното петмесечно бебе, кое потоа е однесено на Клиниката за детски болести каде се наоѓа на опсервација. Станува збор за тешко труење на ова осумчлено семејство, за кое се претпоставува дека јаделе од една од најопасните печурки на овие простори, аманита.
Ова е едно од најмасовните труења со печурки, но поради сезоната на печурки не е исклучена можноста и за други труења велат лекарите Поради ова лекарите препорачуваат особена внимателност кога се берат и консумираат печурките кои се берат на отворено.
