По наредба на претседателот на Сојузот на синдикати Живко Митрески, новинарите грубо избркани од денешната седница на Советот. Тој со помош на обезбедувањето ги избрка екипите на Алсат М и на Вест, а на останатите воопшто не им дозволи да влезат во зградата, со образложување дека седницата ќе биде затворена. А, на седницата тензично. Според информациите од присутните, за малку ќе дошло и до физичка пресметка. Причината била изнесените податоци за незаконското работење на Митрески.
„На денешната седница која не личеше на седница, баравме Митрески да ни ги достави сите трансакции, уплати и исплати од неа како би виделе дали како што тој вели, работи транспарентно и дека сметката не е злоупотребена. Даде збор дека на наредна седница ќе се донесат сите материјали, фактури и изводи за тоа од каде се донирани парите“, рече Дарко Димовски – секретар на Совет на ССМ.
Синдикатите на индустрија, енергетика, рударство, на Управата, правосудски органи и здруженија, на Одбраната и на Угостителство и туризам, тврдат дека имаат докази оти претседателот работел самоволно и без знаење на телата на Сојузот на синдикати. Отворил втора сметка на која што доаѓале средства за кои што синдикатите немале инфромациија колкави се и од кого се.
Тој без дозвола од членството отворил повеќе жиро сметки и со синдикалните пари живеел луксузен живот. Според документацијата и изводот од сметките на ССМ, Митрески повлекувал пари од добивката на фирмата „Син – аг“ која е основана од ССМ. Тој земал и секој месец по 13 илјади денари за одвоен живот иако има стан во Скопје, бил животно осигуран на непозната сума, а само во еден ден со синдикални пари платил 1.500 евра за кафеана.
