Осиромашените граѓани на Црна Гора пронаоѓаат начини да стигнат до калифорниските плантажи на марихуана, каде физичките работници можат да заработат стотици долари дневно.
Поради партиските вработувања во државата, Игор, кој учел медицина, одлучил да сврти нов лист и да замине во Калифорнија, на повик на тамошен пријател од Подгорица.
Таму ќе работи како нискоквалификуван работник во округот Хумболдт, на плантажа со марихуана која во таа држава е легализирана за медицински цели, а од почетокот на оваа година и за рекреативни.
Неможноста за наоѓање работа во Црна Гора од една страна и примамливата дневна заработка од друга, создале специфична група мигранти која работи на плантажите со марихуана, покажува истражувањето на CIN-CG/BIRN.
Некои соговорници велат дека работа на плантажите со марихуана нашле преку пријателски и роднински врски, додека на некои тоа им го организирале посредници, со потекло од Црна Гора.
Според информациите, сумите кои можат да се заработат дневно со оваа работа се многу високи – достигнуваат и до 900 долари.
