Сите градинки ги добиле алгоритмите како да постапуваат доколку некое дете или пак вработен има симптоми слични на Ковид-19. Во тој случај, како што појасни министерката за труд и социјална политика, има посебна просторија каде ќе биде изолирано по што се известува родителот или старателот а потоа и епидемиолог.
Шахпаска на првиот ден од стартот на градинките по 6 месечна пауза поради пандемијата со Ковид-19, вели дека се уште има слободни места во градинките согласно протоколите што ги донесе Комисијата за заразни болести.
Проценките на МТСП велат дека согласно протоколот во градинките има место за повеќе од 19.000 деца. Предност имаат деца на самохран родител или родители кои работат, а двајцата мора да се на работното место. Според податоците од градинките нешто повеќе од 14.000 деца се пријавени за посетување градинка, а има место за повеќе од 4.000 деца. Апелирам до сите чинители кои се вклучени во згрижувањето на децата од претшколска возраст при најмал сомнеж за Ковид-19 кај детето да алармираат. Министерството за здравство донесе посебни протоколи и алгоритми со постапки според кои се постапува со децата кои се сомнителни на Ковид-19, изјави министерката Шахпаска.
Од труд и социјала велат дека сите вработени во градинките носат маски а децата на прием влегуваат по претходно мерење на температура и дезинфекција.
