Ние ја спасувавме Македонија од тужба пред меѓународен суд, а вие не судите за криминал. Ова е дел од одбраната на осомничените за проневера на еден милион евра во случајот „Агент“. Обвинетите се товарат дека незаконски стекнале корист, а тие тврдат дека во случајот нема оштетена страна.
За две недели Кривичниот суд ќе ја објави пресудата за екс разузнавачот Слободан Богоевски, двајцата адвокати Томановиќ и Пешликовски и уште тројца обвинети во случајот познат како „Агент“.
Тие денеска на рочиштето за завршни зборови побараа ослободителна пресуда и негираа перење пари и било какви злоупотреби со земјиштето кај базенот во Карпош.
„Совеста ми е чиста, противправно не сум стекнал ниту едно евро“ рече адвокатот Томановиќ.
И тој и Богоевски објаснуваа оти нелогично е да одговараат дека стекнале незаконска корист кога во судскиот процес нема оштетена страна. Адвокатите велат во случајот станува збор за нормални облигациони односи и нема никаков криминал. Според обвинетите, со договорите тие ја спасиле Македонија да биде дадена пред арбитражен суд бидејќи државата во 2000 година на кипарската фирма на бизнисменот Кондаминас и продала земјиште кое не било нејзино.
Богоевски и двајцата адвокати речиси 8 месеци се во притвор. Обвинителство ги товари за злоупотреба на службената положба и дека испрале 1 милион евра преку фиктивни фирми и фиктивни договори.
