Попладнево околу 15,30 часот автомобил излета од патот кај Спомен Костурницата и падна на новоизградениот кружен тек. Автомобилот летнал во височина од десетина метри колку што е разликата помеѓу патот каде возел и таму каде слетал. Автомобилот е безмалку искршен. Повредени се четири лица во автомобил комби фолксваген шаран . Според дежурниот доктор од Општата Болница во Велес едно од лицата е итно пренесено во Ургентен во Скопје, објави порталот tirekovmirece.com
– Околу 16 часот кај нас беа донесени четири пациенти , едното е на возраст од 6 до 7 години, останатите три од 18 до 20. Детето е со повреди на глава со сериозни повреди и пренесено во Скопје додека трите првично не се животно загрозени, некои имаат скршеници а за други ги чекаме резултатите – изјави за порталот д-р Љупчо Леов дежурен доктор во велешката Болница.
Таму беа блиски на повредените, кои раскажаа дека младите штотуку излегле да се повозат со колата и се случила несреќата. Двете лица биле браќа, детето со уште едно момче а другите двајца соседи и другари. Сведоци на настанот се неколку дечиња на десетгодишна возраст кои играле на платото пред Костурницата.
– Колата доаѓаше кон населбата и возеше брзо. Наеднаш како да се лизна на земја и песок што ја има на патот, почна да оди кон провалијата и излета. Падна долу на патот. Едно од момчињата излета додека колата се лизгаше и беше на тревата, имаше едно мало дете во неа. Возачот едвај го извадија од колата, која беше смачкана – велат децата сведоци.
На местото на настанот беше увидна екипа на СВР Велес. од таму најавија повеќе информации за подоцна во текот на денот.
