Сувенирите со портата „Македонија“ и со Александар Македонски, односно „Воинот на коњ”, како што официјално е заведен, со месеци не можат да се најдат во специјализираните пунктови со сувенири и музејски копии, пишува „Вест“.
Туристите ги разграбале овие два сувенира само три месеца откако Министерството за култура постави пет монтажни продавници во центарот на градот. Во овие специјализирани објекти сега има само магнети, маици, капи и чаши со мотиви од земјата.
Перо Јосифовски, директор на Музеј на Македонија, кој стопанисува со пунктовите со сувенири и музејски копии, за весникот изјавил вели дека во тек е тендер за набавка на сувенирите кои фалат во продавниците, меѓу кои и „Воинот на коњ” и Портата.
– Навистина ги нема во сувенирниците веќе неколку месеци, но ние ги набавивме и ги очекуваме во текот на месецот да стигнат, оти се прават во Кина. Од сите сувенири имавме по 500 примероци, но се потрошија. Сега нарачавме поголем број, и штом ќе дојдат во Скопје, веднаш ќе ги изложиме во пунктовите – изјавил Јосифовски.
Тендерот за изработка на сувенири, кој лани го распиша Министерството за култура, го доби фирмата „Агенс”, која направи околу 160 различни мотиви, од кои голем дел се од „Скопје 2014″, но има и манастири, цркви и други мотиви од градовите во државата. Вредноста на склучениот договор беше околу 360 илјади евра.
Вест
