Турската армија соопшти дека денеска соборила неидентификувано летало, кое навлеголо три километри во турскиот воздушен простор преку границата со Сирија, откако претходно до него биле упатени три предупредувања, пишува весникот „Милиет“.
Во соопштението се посочува дека авионот бил соборен од турски авиони, кои патролираат долж границата, во согласност со правилата за реакции на турските вооружени сили на трансгранични закани.
„Милиет“ додава дека соборениот авион е беспилотен.
Сите руски борбени авиони се вратија во базата во Латакија, а беспилотните летала ги исполнуваат своите мисии според планот, соопшти руското министерство за одбрана.
Руското министерство го објави соопштението по обвинувањата на Вашингтон дека дронот урнат од турската војска е руски.
Дел од турските медиуми јавија дека урнатиот дрон е „орлан-10“ од руско производство, но компанијата Текнолоџикал сентер од Санкт Петербург соопшти дека леталото на фотографиите објавени на социјалните мрежи не е нивно.
„Тоа летало на фотографиите дефинитивно не е „орлан“. Русија нема беспилотни летала со текви крила и стабилизатори“, се вели во соопштението на компанијата, во која инцидентот е окарактеризиран како провокација.
