Во Атланскиот Океан е пронајден рускиот брод „Љубов Орлова“, кој од 24 јануари слободно плови низ отворениот океан без екипаж и предупредувачки светла.
Местоположбата на бродот била утврдена од американската Национална агенција за геопросторно разузнавање. Бродот е откриен на 2.400 километри западно од брегот на Ирска. Експертите сметаа дека тој претставува опасност за животната средина и стравуваа дека може да удри во некоја нафтена платформа.
– Во случај на судар, потонување или која било друга несреќа „Љубов Орлова“ веднаш ќе го испшушти горивото, пираленот и другите токсични течности, азбест, жива и друг нерастворлив отпад, предупреди во вчерашното соопштение француската еколошка организација „Робен де Буа“ (Робин Худ).
Бродот, произведен 1976 година, исплови од канадскиот брег на 23 јануари и требаше да биде одвлечен во отпад во Доминиканската Република. Но, еден ден подоцна пукна кабелот и бродот остана во меѓународни води. Потоа беше прикачен на „Атлантик хок“, но „Љубов Орлова“ повторно се откачи.
Бродот, долг сто метри, е именуван по руската филмска ѕвезда од 30-тите години.
