Од 15 септември здравствените установи ќе мора да ги снимаат хируршките интервенции и да ги архивираат снимките.
Во врска со новите правила, Министерството за здравство донесе правилник согласно со Законот за медицински студии.
Ќе се снимаат операции од сложени и ретки случаи за кои кадарот не е усовршен и кога се применува недоволно познат метод. Снимките потоа ќе се архивираат во база. Установите треба да се подготват и некои од нив да набават опрема, имајќи предвид дека ќе треба да се снима само еден помал дел од отворената хирургија, кога се работи за нови, невообичаени случаи и методи кои ги немаат усовршено поголем дел од докторите.
Со оваа новина во македонското здравство еднаш засекогаш ќе се стави крај на гласини дека е направена лекарска грешка, така што се овозможува заштита на правата на пациентите, но и на здравствените работници.
Доколку установата не овозможи снимање на интервенциите, предвидени се парични или затворски казни за одговорните.
