Малезискиот патнички авион е срушен од ракета земја- воздух испукана од руските сепаратисти, изјави Антон Герашенко, министер за внатрешни работи на Украина. Авионот со 295 патници е срушен кај Торез, близу Шахтерск, на границата на Украина кон Русија, подрачје во кое деновиве има интензивни борби.
Герашенко тврди дека сите патници се мртви.
Руското Министерство за одбрана денеска како апсурдни ги отфрли украинските обвинувања дека ракета истрелана од руски воен авион на 16 јули го погодила украинскиот авион „СУ-25“, што бил на задача над југоисточна Украина.
Висок претставник на министерството за ИТАР-ТАСС изјави дека Украинците ја обвинуваат Русија речиси секојдневно, ветувајќи несоборливи докази за своите тврдења, кои никогаш не се појавуваат, туку лансираат нови и нови „уште пофантазмагорични обвинувања“.
И рускиот амбасадор во ОН, Виталиј Чуркин, категорично ги отфрли обвинувањата за уривање на украинскиот авион, пренесуваат британските медиуми.
Ова, инаку, е првпат Киев да изнесе обвинување против руските воздухопловни сили.
