Астрономи од Универзитет во Тенеси открија дека астероидот „1950 ДА“ со должина од еден километар, кој и се приближува на планетава, може да го уништи човештвото.
Според нивните предвидувања ударот би требало да се случи на 16-ти март 2880 година и тој би предизвикал катаклизма, слична на онаа во која исчезнале диносаурусите. Астероидот кој го носи името „1950 ДА“ за прв пат е забележан уште во 1950 година, меѓутоа експертите дури сега заклучиле дека тој може да биде сериозна закана за Земјата.
Тие велат дека се фрапирани од фактот што тој до сега не се распаднал поради големата брзина со која се движи околу својата оска и веруваат дека го држат Ван Дер Велсовите сили, но не се сосема сигурни во тоа. Она што според научниците е важно за луѓето, е што се уште не е пронајден начин како да се сопре ова големо вселенско чудовиште.
По ударот на астероидот во руската област Чељабинск, повторно се појави интерес за откривање на начините за борба против ваквите случувања.
Научниците сметаат дека евентуално испраќање на некој објект кој би можел да се судри со астероидот „1950 ДА“ би можел да ја направи опасноста уште поголема за планетава, односно би можело да дојде до пореметување на силите на кохезија и расцепување на повеќе мали астероиди, кои би го продолжиле патот кон Земјата и повторно би биле опасни за неа и човештвото.
Инаку астроидот кој ни се приближува во моментов се движи со брзина од 15 километри во секунда, а според проценките би можел да падне во Атлантскиот океан со брзина од 61.000 километри на час. Ударот се споредува со детонација од 44.800 мегатони ТНТ. Она што кај научниците влева надеж дека човештвото сепак ќе преживее, е податокот дека можниот удар ќе се случи за 870 години и во тој долг период ќе може да се пронајде решение за уништување на потенцијалната закана.
