Јас не сум тој што го лустрира Kомисијата за верификација на фактите, туку тоа е некој друг човек, кој носи исто име и презиме, изјави вчера Петар Kарајанов, поранешен функционер од времето на социјализмот.
– Од документите се гледа дека не станува збор за мене бидејќи јас сум роден во 1936 година, а не во 1937 година, и јас немам брат, туку сестра. Освен тоа никогаш не сум бил во Шведска, а во документите се информира за Петар Kарајанов, кој како кодош одел во Шведска кај својот брат по информации за службите. Погрешни се и податоците за факултетот на студирање и други податоци поради што е очигледно дека не станува збор за мене, туку за друго лице – рече Kарајанов и додаде дека живеел во Скопје, а не во Гевгелија, како што стои во документацијата.
Петар Карајанов ја повика комисијата да му се извини за направената штета и да признае јавно дека лицето кое е прогласено за кодош е друг Петар Карајанов, а не биорецот од НОБ, поранешниот секретар на Градскиот комитет на КПМ.
Од Kомисијата за лустрација ни изјавија дека остануваат на тоа што го утврдиле.