Хеликоптерите полека ги евакуираат патниците од горната палуба на “Norman Atlantic” кој по избивањето на пожарот, почнал да плови по море меѓу Грција и Италија.
На траектот дошле и лекарски тимови и спасувачи, за да се грижат за погодените патници и екипажот, додека трае операцијата за спасување во која учествуваат шест хеликоптери, кои на италијанските воени бродови пренесуваат 6 до 7 лица на секој лет.
Во помош на траектот во неделата први дошле бродови кои пловеле во близина, но немирното море оневозможило нивно доближување, па операцијата продолжила со помош на италијански и грчки хеликоптери.
Еден маж од грчка националност загинал вчера кога се обидел да скокне од траектот кој горел, а четири лица се повредени. 17 патници биле пренесени со хеликоптери во Галатино во јужна Италија, меѓу кои има жени, деца и повредени.
Италијанскиот траект “Norman Atlantic”, кој пловел за грчката компанија “Anek Lines” бил на пат меѓу Патрос на западот на Грција кон Анкона, со 478 патници и членови на екипажот и околу 200 возила.
Поголем дел од патниците се Грци, Турци и Италијанци.
