Храбриот татко кој се бореше со ајкула за да ги заштите децата кои се капеа на една австралиска плажа, доби отказ по враќањето во Велика Британија затоа што формално во тоа време бил на боледување и не смеел да престојува по плажите.
Пол Маршалси стана херој кога скокна од плажата во водата за да ја зграби за опашка ајкулата која се движела кон децата во плиткото. Драмата се одиграла додека Маршалси подготвувал скара за сопругата, ќерката и група пријатели на плажата Булкок во Квинсленд.
Кога два месеци подоцна се вратиле од Австралија, Пол Маршалси и неговата сопруга Венди добиле отказ во хуманитарниот фонд каде што работеле, затоа што барале боледување „поради стрес на работа“.
Пол сега прима социјална помош во една од најсиромашните општини на јужниот дел на Велс.
– Што сега да правам? Нема баш голема побарувачка за луѓе кои се борат со ајкули во мојот град, се запрашал Маршалси.
