Обилните дождови предизвикаа поплави во некои делови на Босна и Херцеговина, каде ситуацијата е најкритична во Сараево, додека во Хрватска извесно време, без електрична енергија остана цела Славонија.
Во Босна голем дел од Сараево остана без струја, затоа што поплавени се и трафостаниците. Од Електродистрибуцијата истакнуваат дека сите расположливи екипи од вчера се распоредени на санација на дефектите, но нагласуваат дека ситуацијата постојано се менува, затоа што дополнително имаат нови дефекти.
Дополнителен проблем е тоа што дел од населените места останале и без вода, а се излеаја реките Босна, Добриња, Миљацка. Останатите реки се приближуваат до горните граници. Дождовите предизвикаа и свлечишта, и излевање на водата на патиштата, па сообраќајот е отежнат.
Поплави има и во Тузла, каде нема загрозени објекти, но под вода се посевите.
Со заладувањето, снег паѓа на Романија а во дел од планинските предели издаден е црвен аларм, поради исклучително опасното време.
Во Хрватска, поради обилните врнежи проследени и со град, утринава Славонија остана без струја. Наврнале 67 литри дожд на квадратен метар, речиси насекаде низ земјата.
Снег имаше и во Хрватска, каде на дел од планините беа измерени -1.1 степен. Во регионот околу и во Далмација беснее бура.
Црногорски Дурмитор побеле од снег, каде беше измерен еден степен. За оваа планина, снегот не е невообичаен.
