Се поголем број македонски граѓани ги носат своите деца на вакцинација во соседна Србија. Како што велат дел од родителите, нивните деца имаат право да бидат имунизирани на модерен начин и да ја примат петвалентната вакцина што во земјава се уште не е воведена.
Новата вакцина во Србија од неодамна е ставена на календарот за имунизација и таа штити од разни заразни заболувања како што се детска парализа, дифтерија, туберколоза, голема кашлица, воспаление на мозочната обвивка (менингитис) и против бактеријата Хиб-а (Хаемопхилус инфлуензае тип б), која штити од инфекција на уво, нос, грло, горните респираторни патишта, пишува Вечер.
Вакцината е производство на Санофи Пастер од Франција и како што пишуваат српските медиуми тоа е веќе гаранција за квалитетот. Српските граѓани вакцината ја добиваат бесплатно на товар на Републичкиот фонд за здравствено осигурување
И од македонското Министерство за здравство ја потврдија оваа актуелна состојба. Тие располагаат со неофицијални информации дека е забележана оваа појава, но дека имаат сознанија оти некои од граѓаните петвалентната вакцина ја набавуваат и од соседна Грција. Вакцината може да се купи слободно во аптеките и во Грција и во Србија.
Д-р Јованка Костовска од Комисијата за заразни болести при Министерството за здравство апелира кон родителите дека нема потреба да ги вакцинираат децата надвор од државата. Според неа, ние располагаме со одличен квалитет на вакцини, а тоа нуди и безбедност за децата. Таа очекува наскоро да бидат обезбедени буџетски пари за оваа намена и петвалентната вакцина да се воведе и во земјава и да стане дел од календарот за имунизација.
Вечер
