Бизнис секторот масовно се вклучи во хуманитарните акции за помош на настраданите фамилии од саботното невреме. Над 3000 компании членки на Сојузот на Стопанските Комори се приклучија и донираат парични средства, прехранбени производи, облека, ќебиња, средства за лична хигиена, флаширана вода и се она што им е потребно на граѓаните, пренесе ТВ НОВА.
Стопанствениците одат од врата на врата им ги делат намирниците на граѓаните бидејќи велат дека на тој начин ќе им заштедат и време на луѓето кои се преморени од расчистувањето на штетите. Од ова бизнис здружение сметаат дека потребна е дополнителна работна сила на терен и ги повикуваат сите добронамерници да се вклучат во волонтерските акции.
Една од поголемите компании од градежниот сектор, Трансмет, членка на оваа стопанска комора од саботата вечер е на лице место и рамо до рамо со војската и волонтерите учествува во расчистување на штетите.
Телевизија Нова поразговара со координаторот на оваа фирма во населеното место Сингелиќ, Ибрахим Кочан. Ангажирани се работници волонтери и тешка механизација, поголемиот дел од секојдневните работни задачи ќе им бидат стопирани додека не се стабилизира состојбата во овој реон велат од компанијата.
Потребно е единство и со здружени сили да се им се помогне на граѓаните од поплавените места, вели Кочан. Многу е важна организацијата и координацијата со локалните власти, додава тој. Секое утро се прават планови како да се делува и колку лица и механизација да бидат испратени.
Според пресметките на Сојузот на стопанските комори, секојдневно на сметката за донации легнуваат илјадници евра со кои се купуваат потребните производи за граѓаните од поплавените подрачја.
