Денеска официјално започнува судскиот процес за катастрофалниот пожар во кочанскиот ноќен клуб „Пулс“, каде на 16 март 2025 година животот го загубија 63 млади лица. Случајот ја потресе целата држава, а судењето во Идризово ќе ја открие сериозната одговорност на сите инволвирани страни.Судијката Диана Груевска Илиевска на почетокот на судењето за пожарот во дискотеката „Пулс“ во Кочани, во кој загинаа 63 лица, нагласи дека процесот нема да гарантира брзина, но ќе се одвива непречено:
– „Не можеме да ви гарантираме брзина во судењето, но ќе направиме сѐ, за процесот да се одвива непречено. Не знаеме колку ќе трае, може 5 месеци или 5 години.“
Таа повика на дисциплина од сите странки и истакна:
– „Барам дисциплина од сите странки. Сите ќе имаат можност да ја изнесат својата верзија на случајот и својата одбрана. Ќе дојдеме до правдата.“
https://www.facebook.com/share/v/17i1AvT6ht/?mibextid=wwXIfr
Втор судија во советот е Ахмет Идризи, а присутен е и резервен поротник за непречено одвивање на постапката. По читањето на имињата на присутните 34 обвинети и нивните адвокати, судијката донесе решение постапката „Кочани“ да се спои со обвинението против сопственикот на агенцијата за обезбедување „Рубикон“, Александар Нацев:
– „Се спојуваат постапките поради економичност на постапката. Против ова решение не е дозволена жалба. Како што знаете, дополнително имаше обвинителен акт за Александар Нацев, кој е оценет. Се работи за истите дејствија и предметот ќе се спои, постапката ќе тече заедно.“
На судењето присуствуваат над 50 родители на загинатите и околу 30 домашни медиуми, како и акредитирани странски медиуми: БМТ, ТРТ, Франспрес, Ројтерс, Асошиејтед прес, Андалузија и други.
Поранешниот градоначалник на Кочани, Николче Илиев, ќе биде бранет од пет адвокати по обвинението за тешки дела против безбедноста во пожарот.
Обвинителниот акт, поднесен од ОЈО Кочани, детално ја опишува системската негрижа, свесните пропусти и корупцијата кои довеле до трагедијата. Вкупно 34 физички лица и 3 правни субјекти се товарат за „Тешки дела против општата сигурност“, а обвинението открива серија скандалозни пропусти на повеќе нивоа:
Сопствениците и менаџерите – клубот бил реконструиран нелегално, со лесно запаливи материјали, само еден излез и без функционални хидранти, што го направило објектот смртоносен во случај на пожар.
Обезбедувањето – неоснована работа на црно, без контрола на посетителите и дозволување внес на пиротехнички средства и малолетници.
Општина Кочани – три генерации градоначалници и инспектори биле свесни за нелегалното работење на клубот, но не презеле никакви мерки за негово затворање.
Државни институции – пропусти од Дирекцијата за заштита и спасување, Министерството за економија и Државниот пазарен инспекторат, вклучувајќи незаконско издавање лиценци и фалсификувани документи.
Корупција – службеник од Министерството за економија се товари за примање мито и фалсификување документи за нелегална лиценца на клубот, со сума од 226.000 денари.
