Полицијата во Босна и Херцеговина вчеравечер спровела голема акција за разбивање меѓународен синџир на организиран криминал и проституција, потврди обвинителството на БиХ, кое ја координирало акцијата.
Како што е објаснето, слична операција речиси истовремено е спроведена и во Германија и во Австрија. Акцијата била насочена кон откривање меѓународен синџир за организиран криминал поврзан со трговија со луѓе поради проституција и други кривични дела.
Жртвите во најголем број биле од Балканот, а, според оперативините информации, имало и малолетни лица. Истрагата била насочена кон група турски државјани осомничени за извршено кривично дело трговија со луѓе и меѓународно врбување поради проституција.
Акцијата била резултат на долга и темелна истрага на судските и полициските агенции на Германија чии обвинителите и истражители со месеци работеле заедно со колегите од ЕУ на откривање на синџирот за организиран криминал.
