Тензичната ситуација во Сирија очигледно денеска кулминира откако кон земјата се упатија воени бродови на американската, но и на руската морнарица. Повеќе светски медиуми денеска пишуваат за опасноста Сирија да биде теренот за нова пресметка помеѓу светските сили, а уште еден факт јасно говори за сериозноста на ситуацијата.
Од утрово на небото над Сирија не движи ниту еден патнички авион. На интерактивните светски страни кои го следат движењето на летовите, може да се забележи дека на сириското небо, а ниту во близина на границите на земјата, не минуваат леталата на авио – компаниите.
САД, Велика Британија и Франција се согласија дека ќе дејствуваат со заеднички сили и најверојатно се подготвуваат за напад. Британската премиерка Тереза Меј е подготвена да дозволи учество на британската војска во воена акција. Тие на ова се одлучија по наводниот хемискиот напад во саботата во сирискиот град Дума.
Последиците од евентуален американски напад врз Сирија можат да бидат катастрофални, бидејќи може да се вмеша и Русија, која е долгогодишен сојузник на сирискиот претседател Башар ал Асад.
