На 21 февруари, четири дена по породувањето, починала Саломе Карва, жената што беше симбол на борбата против еболата и Личност на годината на магазинот „Тајм“ за 2014 година.
Наводно луѓето во болницата не сакале да ѝ помогнат, правдајќи се дека „таа имала ебола“.
Од ебола починаа родителите на Карва, браќата и речиси сите роднини во август 2014 година. И таа беше заразена, но успеа да преживее.
Истата година таа пишуваше во „Гардијан“ со намера да го сподели своето искуство и да им помогне на заболените, бидејќи по излекувањето работеше во центар на Лекари без граници во Либерија.
Саломе починала на 21 февруари, четири дена откако го родила своето четврто дете.
– Ѝ се слоши, беше префрлена во болница, но никој не сакаше да ја допре додека повраќаше и се онесвестуваше. Вработените беа во паника и викаа дека имала ебола. Не сакаа да бидат во контакт со неа, само ја оставија, никој не сакаше да ѝ даде ниту инјекција. Можеби ќе преживееше да ѝ понудеа помош – раскажала нејзината сестра Џозефина Менли.
Менли не знаела да каже од што точно ѝ се влошила состојбата на сестра ѝ, но претпоставува дека можеби нешто тргнало наопаку за време на царскиот рез.
– Моето срце е скршено. Таа ги обожаваше своите деца. Едногодишното и новороденчето ќе растат без да ја познаваат својата мајка – тагувала сестрата на Саломе.
Саломе Карва во 2014 година говореше дека луѓето треба да се борат против стигматизација на заболените од ебола и дека медицинскиот персонал треба да најде среќа во тоа што се бори за животот на пациентите со тешки болести, како што тоа го правеше таа.
– Ги третирав пациентите како да се мои деца. Им зборував за своите искуства. Им ја раскажував мојата приказна за да ги инспирирам и да им кажам дека можат да преживеат – говорела Саломе.
Ела Ватсон-Страјкер, која работела со Карва во Либерија и исто така се најде на насловната страница на „Тајм“ меѓу борците против ебола, изјавила: „Да преживееш ебола и потоа да умреш од пропуст во здравствениот систем… не знам што да кажам.“
