Дваесет и шест случаи на заболени од ХИВ-СИДА се откриени во првите седум месеци од годинава.
Од нив 10 граѓани се болни од СИДА, а 16 се ХИВ позитивни. Според полот, 25 се мажи, а само една е жена. Најголем број од нив се заразиле во хомосексуална врска, соопшти денеска доктор Жарко Караџовски, началник на Одделот за ХИВ и СИДА при Комисијата за заразни болести, на прес конференција.
Во изминативе 12 месеци, починале двајца мажи болни од СИДА, едниот бил на возраст од 40 до 49 години, а помладиот на возраст од 30 до 39 години. Најголем број од заболените се во Скопје – 16, две лица се од Свети Николе, тројца од Куманово, по еден во Тетово, Струмица и во Штип, а двајца од заболените се од Струмица.
Во периодот од 1987 година до денес се регистрирани 223 лица кои живеат со ХИВ и СИДА. Доктор Караџовски вели дека според последните истражувања, и голем дел од затворениците истакнале дека не користат кондоми како превентивна заштита, а дури 50 проценти од младите исто така не „љубеле“ да имаат сексуален однос со кондоми. Во 2013 година се изработени дури 24.562 теста за дијагностика на ХИВ во Македонија.
