Лидерите на Европската унија го разгледуваат планот за запирање на влезот на мигрантите преку Балканот и целосна блокада на македонската граница со Грција, со што грчката власт ќе биде присилена итно да поработи на заштита на надворешните граница на Унијата, тврди британскиот весник Фајненшел тајмс.
Лондонскиот весник наведува дека за тоа во понеделник ќе расправаат министрите за внатрешни работи на ЕУ и додава дека Европската комисија и заинтересираната Германија се подготвени да го поддржат предлогот на Словенија ситуацијата да се промени така што ќе и се помогне на Владата во Македонија да ја затвори границата со Грција и да се спречи неконтролиран прилив на мигранти.
За словенечкиот предлог и замислата на две години да се стави вон сила шенгенскиот простор без граници во случај на “трајна сериозна нефункционалнот“ во средата веќе разменија мислења амбасадорите на земјите членки на ЕУ во Брисел, кој го подготвуваа дневниот ред за заседанието на министрите за внатрешни работи на ЕУ за понеделник во Амстердам.
И при посетата на унгарскиот премиер Виктор Орбан на Словенија, тој го поддржа словенечкиот предлог “со директна помош на Скопје да се издејствува засилување на надзорот на границата со Грција и така да се запре бранот нерегуларни имигранти“
Големо внимание привлече и изјавата на германската канцеларка Ангела Меркел дека турскиот премиер Ахмет Давутоглу и дал цврсто уверување дека ќе направи се да се стопира приливот на мигранти кон Европа, кој за возврат би добил за Турција три милјарди помош од ЕУ.
Во некои медиуми тоа беше протолкувано и како остра критика кон Грција, а на тоа се надоврза и австриската министерка за внатрешни работи Јохане Лајтнер која се закани дека Грција ќе биде исфрлена привремени од Шенген зоната ако не ја зајакне контролата на својата граница и го спречи приливот на мигранти.
Коментаторите на повеќе медиуми во ЕУ посочуваат дека со затворањето на македонско-грчката граница, Грција ќе биде изолирана од шенгенскиот простор и останатиот дел на Унијата.
